[google05f5c7d94ac18bb8.html]
آخر الأخبار

مى طارق تكتب : الحلقه السابعه من ” فارس احلامى “.

مى طارق

نظر عمر الى لبنى مستغربا فهو لم يشارك فى هذه الهدية ولا يرغب فى مهاداتها فهو لا يشعر اتجاهها سوى بالشفقة

فتحت فريده العلبه فوجدت فيها اسوره رقيقه جدا من الفضه و بها فصوص بنفسجيه الون و بجوارها خاتمها و به فصوص من نفس اللون 
ابتسمت فريده و قالت : ميرسي ليكى يا لولو حلو اوى الطقم ده ثم نظرت الى عمر و قالت : ميرسي ليك يا عمرانا بجد مش عارفه اقولكوا ايه
حاول عمر انا يدارى اندهاشه و قال : متقوليش حاجه المهم انها عجبتك 
قالت فريده بسعاده : عجبتنى اوى كفايا ان انتوا الى جيبينها . عن اذنكوا ثوانى و توجهت الى غرفتها 
فانتهز عمر الفرصه و قال للبنى : ايه الى انتى هببتيه ده مين قالك انى عايز اجيبلها هديه 
قالت لبنى باندهاش من طريقه كلام عمر التى تغيرت فجأه : لما لاقيتك بتعاملها حلو قولت اقول انك شاركتنى فى الهديه فيها ايه يعنى 
عمر بغضب : فيها ايه ؟!. فيها انى مش عايز اجيبلها حاجه انا بعاملها كده بس عشان هى صعبانه عليا مش اكتر و بعد كده متتصرفيش من نفسك لو سمحتى
قالت لبنى بضيق : حاضر و اسكت بقي عشان هى جايه خرجت فريده من الغرفة فشعرت ان فى شئ غريب و انهم صمتوا عندما جائت و لكنها لم تعبئ بذلك و قالت و هى تعطى علبه مغلفه بورق هدايا الى عمتها : يا رب هديتى تعجبك يا عمتو ثم فعلت نفس الشئ مع لبنى : لولو حبيبتى انا فكرت اجيبلك ايه كتير بس فى الاخر استقريت على الهدية دي يا رب تعجبك . ثم نظرت الى عمر و قالت: اتفضل يا عمر 
سناء : ليه تعبتى نفسك كده يا بنتى والله مالوش لزوم 
فريده : تعب ايه بس ياعمتو . يا رب بس تعجبوا . 
لبنى : هتعجبني عشان انتى الى جيباها يا ديدا 
فتحت سناء هديتها فوجدتها زجاجه “برفان ” فقالت و هى تشمها : تسلم ايدك يا فريده حلو اوى البرفان ده
فريده : الحمد لله انها عجبتك
نظر عمر الى فريده ثم الى الهديه و قام بفتحها ففوجأ بساعه من ماركه معروفه و غاليه الثمن فقال : ايه ده يا فريده . 
نظرت اليه باندهاش و قالت : انت مش بتحب ساعات ؟!
عمر : مش كده بس الساعه ديه غاليه اوى 
نظرت اليه فريده و قد ازداد اندهاشها بعد جملته الاخيره و قالت : اولا مفيش حاجه تغلى على اخويا ثانيا هى مش غاليه ولا حاجه ده انا كان نفسي اجيب حاجات احسن من كده بس الوقت مكنش مساعد و انا مكنتش عارفه انتوا بتحبوا ايه
نظرت سناء الى عمر بلوم و قالت و هى تحاول اصلاح ما افسده عمر : عمر ميقصدش حاجه يا فريده
فريده : عارفه يا عمتو ثم وجهت فريده كلامها الى لبنى مش هتفتحى هديتك بقي يا لولو 
لبنى : لأ طبعا فتحها . فتحت لبنى هديه فوجدتها علبه مكياج 
فقالت : الله يا ديدا علبه مكياج و من نوع ………….. انا كنت بشوف اعلاناته فى التلفزيون و كان نفسي اجربه اوى بجد شكرا يا ديدا و اخذت تقبلها فى سرور
نظر اليها عمر قائلا : المكياج ده مش هيتحط فى الكليه ولا و انتى خارجه لوحدك مفهوم
سناء : هو انت على طول كده اختك عارفه انها مش هتخرج بالمكياج لوحدها مش عارفه ايه لزمته الكلام الى زى السم ده
حاولت فريده تغير الموضوع فقالت : يلا تعالي يا لبنى لبسينى الاسوره عايزه اشوفها على ايدى 
نظرت لبنى لفريده بوجوم و حزن : حاضر يا ديدا . ثم قالت محاوله اغاظه عمر :و بعدين تحطيلي ميك اب عايزهاشوف شكلي بيه هيبقي ازاى
فهمت فريده ما ترمى اليه لبنى فقالت لتأخذ تارها من عمر و ترد اليها كرامتها : اكيد هتبقي زى القمر يا لولو
سناء و هى لم تفهم ما يدور : ربنا يحميكوا انتوا الاتنين مش عايزين ميك اب ولا حاجه
نظر عمر اليهم بغضب : انا داخل انام تصبحوا على خير 
فقالوا فى صوت واحد و انت من اهل الخير ثم نظرت لبنى الى فريده ثم انفجروا ضاحكين
لبنى : اوف بارد بس احسن غظناه
فريده و هى مازالت تضحك : حرام عليكى يا لولو كفايا ضحك يقول علينا ايه
لبنى : على اساس انك مش بتضحكى يعنى
فريده : الصراحه انا مبسوطه اوى 
لبنى : كل ده عشان غظنا عمر لو كده هغظهولك كل يوم
فريده : لأمش مبسوطه عشام غظنا عمر . انا مبسوطه عشان اول مره احسن ان ليا اخوات وبرخم عليهم و بيرخموا عليا بخاف عليهم و بيخافوا عليا احساس حلو اوى طول عمرى كان نفسي احسه
لبنى: لو على الرخامه مفيش اكتر منها . ده عمر برميل رخامه يعنى هتشبعى رخامه لحد ما تقولى يا بس
فريده : حرام عليكى ده عمر شكله طيب اوى
لبنى : ماشي يا ستى يلا مش هتدخلى تنامى
و فى صباح اليوم التالى استيقظوا كالعاده فى ساعه مبكره و على مائده الافطار قال عمر موجه حديثه الى فريده
عمر : فريده انتى هتكملى دراستك هنا مش كده 
فريده : اه ان شاء الله
عمر : يعنى هتكونى معايا فى نفس الكليه بس انا سابقك بسنتين
فريده : ايوه يا عمر 
عمر : خلصتى اجرائات نقلك للجامعه هنا
فريده : ايوه يا عمر
عمر : اوك ظبطى نفسك بقي عشان الدراسه هتبدأ الاسبوع الجاي و فضى نفسك بكره عشان نروح ناكد على اجرائات نقلك
فريده : حاضر 
انصرف عمر الى غرفته فقالت لبنى و هى تتاكد من دخول عمر الى غرفته
لبنى : ربنا يكون فى عونك يا ديدا 
فريده : ليه بس يا بنتى
لبنى : عمر مش هيخليكى تروحى فى اى حته لوحدك
فريده : ايه هو فاضيلي يعنى 
لبنى : بكره تشوفى . و تقولى لبنى قالت 
مرت الايام و جاء اول يوم فى السنه الدراسيه الجديده . توجهت فريده مع عمر الى الجامعه . تركها عمر عند مدرجها 
عمر : ده المدرج بتاعك هروح انقلك الجدول و اجى 
فريده : خلاص يا عمر متشغلش بالك بيا انا هتصرف
عمر : انتى متعرفيش حاجه هنا . استنى هنا و مش هتأخر عليكى
فريده : حاضر .
انطلق عمر ليحضرالجدول و بعد ربع ساعه تقريبا حضر عمر و معه الجدول 
عمر : اتفضلي يا ستى الجدول اهه
فريده : ميرسي يا عمر 
قال عمر بلهجه تحذيريه : فريده ملكيش دعوه بالولاد خالص حتى مفيش صباح الخير مفهوم
قالت فريده مستغربه : ليه ؟!
عمر : عشان انتى هنا فى مصر مش في لندن . هنا عندنا قواعد و عادات 
فريده : بس انا فى لندن كنت بتعامل مع زمايلي عادى و بابا كان سامحلى بكده
عمر : انا ماليش دعوه انتى هنا فى مصر باباكى الله يرحمه سابك ليا امانه لازم احافظ عليكى يعنى تسمعى الكلام و انتى ساكته و من غير نقاش مفهوم
قالت فريده متزمره : مفهوم
عمر :انا هروح اجيب جدولى و اشوف الجو عامل ايه كده و انتى شوفى لو عندك محاضرات ولا لأ لو مفيش ابقي كلمينى و اوعى تروحى لوحدك
فريده بضيق : طيب . انصرف عمر و تركها فقالت لنفسها : كان عندك حق يا لبنى

نبذة عن الكاتب

مقالات ذات صله

google-site-verification: google05f5c7d94ac18bb8.html

Powered by www.worldforhost.net