[google05f5c7d94ac18bb8.html]
آخر الأخبار

مصــــرى…للشاعر محمد وفيق

مصــــرى…للشاعر محمد وفيق

بقلم/ الشاعر محمد وفيق

10617539_10152545020867107_906614856_n
الشاعر محمد وفيق

رغم لسانا بينطق مصرى
انما طبع الناس مش واحد
ورغم القلب بينبض مصرى
وربنا عالم بينا وشاهد
انما فينا حاجة غريبة
لما تضيق الحالة علينا
نكره مصر وتبقى مصيبة
رغم ان الاحزان بادينا
احنا اغتابنا وخونا ضميرنا
والشيطان اتملك منا
سيبنا غريب يدخل يكسرنا
وبنفتكروا بيقوينا
احنا نسينا حرام وحلال
علشان بس نسود فى الدنيا
كل هدفنا جمع المال
وتهون كل الناس التانية
شوفوا كام حرب تمنها كراسى
ينجحوا يتحولوا شطرنج
اللى زمان كان لينا مواسى
تلقى واخدله حقنة بنج
طب مين فيهم مصر فى باله
او مين فيهم نسى اطماعه
اللى الشعب انتخبه وشاله
بكره اكيد حايبيع اوجاعه
ياه لو تعرفوا احساسى
ولا تحسوا بخوفى وقلقى
خايف قوى على اهلى وناسى
ومرار حالنا مرر حلقى
ياللا انا وانت نكتب يافطة
مكتوب فيها مصر وبس
ونعلقها فى كل محطة
يمكن بيها حد يحس
حتى بافكر يبقى المجلس
مفروش حصر مافيهش كراسى
علشان بس النائب يجلس
ويفضل فاكر الناس مش ناسى
عايز بس يا مصر اشوفك
احلى عروسة ولابسه الطرحة
حاضنة البدر فى وسط كفوفك
واحنا معاكى نغنى بفرحة
بس المجلس يهدا ويركز
يعرف ان الشعب بتاعه
وان مادمش لحد المركز
ولا خففله من اوجاعه
واحنا شوية شعرا غلابة
مش لاقيين ولا حتى اقلام
ياما زهقنا كلام وكتابة
وكل حروفنا زادتنا الام
بس انا خايف قوى من ربى
لو ماكتبتش اللى باحسه
وابقى بجد بازود ذنبى
حتى العالم دول لو ينسوا
انا باكتبها يا مصر رسالة
ويا ريت بقى تفهمى معانيها
المسالة مش ايد بطالة
المسالة فيه جهل ماليها
فيها شباب قاعد ع القهوة
ومعاه بكالوريوس وليسانس
داس الظلم عليها بقوة
ولما انداسوا مذلة وهلس
مدى اديكى قوام لشبابك
خدى باديهم تعللى لفوق
مش تقفلى للناس ابوابك
وتموتى فيهم بالذوق
موته بموته خلاص راح اقولك
لو تسكتى حاتعيشى مهانة
احنا تعبنا خلاص من ذلك
لما بقينا ولا الدبانة

نبذة عن الكاتب

مقالات ذات صله

google-site-verification: google05f5c7d94ac18bb8.html

Powered by www.worldforhost.net